Парась тыяс

Медшӧрыс

Парась тыяслӧн система пырӧ Тобысь ю ковтысӧ (Печора юлӧн коймӧд пӧрадока вож). Тайӧ карстӧвӧй тыяслӧн система, налӧн джудждаыс волӧ 30 метрӧдз. Кызвыныслӧн пыдӧсас дзулькйӧны ключьяс. Тулыснас тыясӧ, кутшӧмъяс йитчӧны юяскӧд висъясӧн, вермӧ пыравны кульмыны сир, ёкыш да мукӧд чери. Тыясыслӧн джудждаыс 30-17 метр. Ваыс кӧдзыд да сӧдз. Медся ыджыд ты – Егор ты, сійӧ 9 га пасьта. Ыджда серти мӧдыс – Парась ты – 5 га. Нӧшта ӧти аслыспӧлӧс ты – Голубое – 4 га, шемӧсмӧдӧ ваыслӧн яръюгыд рӧмнас.

Вӧр-ва заказник

2021 вося моз 8 лунӧ экологическӧй туризм сӧвмӧдӧм могысь Россия Федерацияса премьер Михаил Мишустин кырымаліс Коми Республикаын «Парась тыяс» федеральнӧй тӧдчанлуна вӧр-ва заказник артмӧдӧм йылысь шуӧм. Заказниклӧн ӧтувъя ыдждаыс 17 сюрс сайӧ гектар. Тайӧ помшуӧмыс отсалас видзны тыяс бердысь ландшафтсӧ да быдмӧг-пемӧссӧ, сідзжӧ сетас позянлун сӧвмӧдны экологическӧй туризм.

Заказниксӧ артмӧдӧмӧн республика пуктіс пай «Экология» национальнӧй проект збыльмӧдӧмӧ да экологическӧй туризм сӧвмӧдӧмӧ.

Официальнӧй статус отсӧгӧн вӧр-ва мутасын лоӧ дирекция, сэні кутасны уджавны канму инспекторъяс, лоӧ колана техника. Тайӧ сетас позянлун ас кадӧ аддзыны да бырӧдны заказниклысь режим торкалӧмъяс, видзны вӧр-ва комплекссӧ, лӧсьӧдны бур условиеяс шойччӧм да олысьясӧс экология серти велӧдӧм-тӧдмӧдӧм вылӧ.