Комиын вӧрзьӧдлытӧм вӧръяс

Тшӧкыда кывлан, мый коми парма – тайӧ «европаса войвывлӧн тыяс». Збыль, планетаным лолалӧ вӧръяс отсӧгӧн. Комиын зэв уна вӧрзьӧдлытӧм вӧрыс. Помтӧм-дортӧм вӧръясын уналаӧ мортлӧн кокыс эз на тувччыв. Тайӧ вӧръяссӧ видзӧны оланпасӧн, найӧ сулалӧны «Югыд ва» национальнӧй паркын да Печора-Ылыдзса заповедникын. Вӧръяссӧ сідзжӧ видзӧны заказникъясын, сэтчӧ вермӧны ветлыны туристъяс.

Коми Парманымӧс шулӧны и «веж зарниӧн».

«Планеталӧн тыяс» быдмӧны 36 262 сюрс гектар площадь вылын, Коми Республика мутасысь тайӧ 87,2%. Европаын тайӧ медся ыджыд вӧр. 1995 вося ӧшым 9 лунсянь «Югыд ва» парк да Печора-Ылыдзса канму вӧр-ва биосфернӧй заповедник артмӧдӧны «Девственные леса Коми» ЮНЕСКО ставмирса вӧр-ва озырлун объект. Россияын тайӧ медводдза объект, кодӧс пыртӧма тайӧ списокӧ.

Комиын вӧрыс ёнджыкасӧ лыска. На пиысь унджыкас воӧдчынысӧ зэв сьӧкыд. Миян озырлун – 1 000 гектар сайӧ караб вӧчан пожӧма вӧр, кӧні пуясыс 5 судтаа керкаысь на джуджыдджыкӧсь. Татшӧм вӧрыс эм Койгортса национальнӧй паркын, кодӧс артмӧдӧма 2020 вося ӧшым тӧлысьӧ. Сэтчӧ позьӧ воӧдчыны Луздор да Койгорт районъяс пыр.