Йӧраясӧс киӧ велӧдӧм могысь вӧчӧм медводдза йӧра видзан ферма.
Йӧра видзан ферма
Йӧра видзан ферма йылысь
Печора-Ылыдзса заповедник сідзжӧ нималӧ йӧраясӧс киӧ велӧдӧм могысь вӧчӧм медводдза йӧра видзан фермаӧн. Йӧра – вежа пемӧс, сійӧс серпасалӧма Коми Республикалӧн да Мылдін районлӧн канпасын, а сідзжӧ нэмӧвӧйся коми кыйсян-вӧралан календарын.
1949 восянь йӧра видзан фермаын быдтӧма уна дас кӧлена киӧ велӧдӧм йӧраӧс, кодъяс туйӧны овмӧс нуӧдӧм вылӧ.
Та дырйи мортӧн быдтӧм йӧраяс эз воштыны вӧрса инстинктъяссӧ. Сӧвет кадӧ босьтчисны быдтыны йӧраясӧс ёнджыкасӧ сы вӧсна, мый найӧ вермӧны новлӧдлыны груз сук вӧрӧд. Ӧні та вылӧ эмӧсь нин снегоходъяс, но фермаын уна во чӧжӧн нуӧдӧма уна тӧдчана туялӧм.
Йӧра йӧв
Киӧ велӧдӧм йӧраяс дорӧ зэв ёна радейтӧны волыны гӧсьтъяс, а республикаын олысьяс тӧдӧны мукӧдыслысь нимъяссӧ. Торйӧн нин тшӧкыда татчӧ локтӧны вайсян кадӧ, кор фермаын позьӧ юны йӧра йӧв. Сійӧ аслыспӧлӧс, ӧрек кӧра быттьӧ. Та кындзи йӧра йӧв бурдӧдӧ висьӧмъясысь.
Йӧлыс зэв нӧгыль, нӧк кодь, сэні эм лизоцим, мый бурдӧдӧ весиг лучевӧй висьӧмысь.
Буретш та вӧсна 1986 воын, Чернобыльса АЭС вылын авария бӧрын йӧра видзан фермаӧ кутісны воны лысьтан йӧраяс вылӧ заказъяс.