Вӧркута
Вӧркута меститчӧ Коми республикалӧн войвылын, сулалӧ кынйир вылын, Полярнӧй кытшсянь 150 километр гӧгӧр войвылынджык да Войвыв Йиа океансянь сӧмын 140 километр ылнаын.
Кар йылысь
Ӧтувъя юӧр
Административнӧй шӧрин: Вӧркута кар
Площадь: 24 179,64 кв. км
Кар кытшын олӧ: 73 123 морт
Медшӧр отрасльяс: из шом перйӧм, электроэнергетика
«Вӧркута» кар кытшса муниципальнӧй юкӧнлӧн официальнӧй сайт: воркута.рф
Нималанторъяс
Вӧркута – «ставмирса юркар». Тадзи сійӧс шуӧны тані олысь войтыр. Буретш Вӧркута медводдзаӧн сетіс из шомсӧ блокадаӧ веськалӧм Ленинградлы Айму вӧсна Ыджыд Тыш дырйи.
Вӧркута – тайӧ ыджыд сьӧлӧма йӧзлӧн кар, тайӧ шахтаяс, тайӧ лӧддза-номъя тӧлысьын лым да кӧдзыд мичлуна тундра.
Вӧркутаын быть колӧ ветлыны выставка залӧ, драма театрӧ, Шахтёръяслӧн дворечын акань театрӧ, ветлӧдлыштны мича архитектураа шӧр уличті.
Карыс нималӧ «Лакомка» кондитерскӧйӧн. Сэтчӧ пыран да быттьӧ веськалан сӧвет кадӧ. Тані позьӧ чӧсмасьны тортъясӧн да пирожнӧйясӧн.
Бӧръя кадӧ ёна волывлӧны экскурсияӧн шахтёръяслӧн пӧдса посёлокъясӧ.
Вӧркутаӧдз республикаса юркарсянь позьӧ воӧдчыны поездӧн либӧ самолётӧн.
Кар гӧгӧрын быть колӧ пырӧдчыны арктическӧй туризмӧ. Та могысь колӧ пуксьыны поездӧ да мунны Сейда либӧ Собь станцияясӧдз, кӧні туриставны заводитысь йӧз вермасны овмӧдчывны керкаясӧ да вагончикъясӧ, медым радиальнӧя петавлыны водопадъяс, гӧраяс, юяс дорӧ. Ыджыдджык опыта туристъяс проводникъяскӧд ветласны кар гӧгӧрті палаткаясӧн да войковтасны вӧр-ваын. Сідзжӧ туризм радейтысьяс вермасны кылӧдчыны Кара ю кузя да кыйны арктикаса чери.