Кулöмдiн район
Кулӧмдін районыс Коми Республикалӧн асыв-лунвылын, Эжва юлӧн ковтысын.
Район йылысь
Ӧтувъя юӧр
Административнӧй шӧрин: Кулӧмдін сикт
Площадь: 26368,01 кв.м.
Олӧ 23 493 морт
Муниципальнӧй районлӧн официальнӧй сайт
Нималанторъяс
Кулӧмдін районлӧн озырлуныс – Трӧича да Степан нима Уллянаса манастыр. Сылысь унджык стрӧйбасӧ кыпӧдісны Соловецкӧй манастырса монахъяс. Манастырсӧ бӧр кыпӧдісны колян нэмся 90ӧд воясӧ. Манастырса кӧлӧкӧльничасянь тыдалӧ мича Улляна сиктыс да сы гӧгӧрыс, а манастырын войковтӧм бӧрын позьӧ олыштны насельникъяс моз йӧзысь ӧтдортчӧмӧн.
Ӧлек грездын туристъясӧс овмӧдасны гӧсьтъяслы керкаясын, петкӧдласны гортса музей да заповеднӧй туйясті нуӧдасны овтӧм Лунпока грездӧ, кӧні коркӧ пуис олӧмыс. Ветланныд кӧ сэтчӧ моз тӧлысьын, туристъяс вермасны вотны тшак да чӧд.
Орчча Руч сиктын позьӧ нимкодясьны ыджыдсьыс-ыджыд куим пучӧра козйӧн. Коз улын вермас дзебсьыны дзонь класс, а сылӧн улыс вожъясыс нин кыз пучӧръяс кодьӧсь. Некымын во сайын татчӧс киподтуя морт дорис вӧвлытӧм персонажъясӧс да «овмӧдіс» найӧс дивӧ пулӧн вожъяс вылӧ.
Кулӧмдінсянь неылын сулалӧ «Застава Коми» – гӧсьтъяслы Вылыс Эжваса важся керка ногӧн кыпӧдӧм керка. Сійӧ сулалӧ ю дорын мича местаын. Тані позьӧ велӧдчыны пуны чериысь да яйысь национальнӧй сёян, пӧжавны коми шаньгаяс, ветлӧдлыштны снегоходӧн, ветлыны роч либӧ сьӧд пывсянӧ да узьны збыльвывса пӧлатьяс вылын. Сідзжӧ тані позьӧ пыжӧн ветлыны Кадам да Донты кузя.
Донты – Кулӧмдін районын чуймӧдантор.
Донты – республикаын сизим медгырысь тыяс пиысь ӧти, нюжалӧма 15 километр вылӧ. Сылӧн пыдӧсас куйлӧ уна нэмся трундаа нюйт да сапропель, мыйӧн позьӧ зырасьны бурдӧдчӧм могысь.
Юрсиктсянь – Кулӧмдін сиктсянь – позьӧ воӧдчыны ю сайын Керчомъя сиктӧ. Сійӧ нималіс живописеч Василий Кандинский отсӧгӧн. «Зыряна дорӧ» ветлігӧн Санкт-Петербургса университетысь студент эновтіс статист-социологлысь уджсӧ да сиис асьсӧ искусстволы.