Мылдiн район
Мылдін районыс Коми Республикалӧн асыв-лунвылын, Вылыс Печоралӧн ковтысын. Сійӧ меститчӧ «Вуктыл кар», «Сосногорск кар» МЮ, Кулӧмдін районкӧд, а сідзжӧ Перым да Свердловск обласьтъяскӧд, Тюмень обласьтса Ханты-Мансийск асвеськӧдлан кытшкӧд орччӧн.
Район йылысь
Ӧтувъя юӧр
Административнӧй шӧрин: Мылдін ккп
Площадь: 40601,12 кв.м
Олӧ 10 612 морт
Муниципальнӧй районлӧн официальнӧй сайт
Нималанторъяс
Мылдін район шемӧсмӧдӧ гӧсьтъясӧс Якша посёлокын йӧраяс видзан фермаӧн. Тулыснас сэні позьӧ видлыны йӧра йӧв, а видзӧдлыны йӧраяс вылӧ позьӧ во гӧгӧр чӧж. Сідзжӧ позьӧ ветлыны озыр научнӧй коллекцияа Вӧр-ва музейӧ.
Мылдінсянь пансьӧ Маньпупунёр платолань туй. Кыдзи и йӧраяс видзан ферма, сійӧ меститчӧ Печора-Ылыдзса биосфернӧй заповедникын. Заповедникын сӧвмӧдӧны экотуризм. Татшӧм туризмыс отсалӧ видзны вӧр-васӧ, та дырйи бура видзӧдӧны туристъяслӧн лыд бӧрся, кодъяс вермӧны волыны сэтчӧ сезон кадӧ. Тані эмӧсь шӧр да войвыв пармалӧн вӧр-ва комплексъяс – вӧрзьӧдлытӧм вӧр-валӧн «эталонъяс». Водзӧ вылӧ найӧс колӧ видзны. Заповедникын олӧ сё джын млекопитающӧй да кыксёысь унджык сикас лэбач. Унджыксӧ на пиысь пыртӧма Гӧрд небӧгӧ. Нимкодьпырысь тані примитасны и туристъясӧс, и волонтёръясӧс. Заповедникын волонтёръяслы уджыс пыр сюрӧ: пыр колӧ бурмӧдны-лӧсьӧдны экологическӧй туйяс, лэптыны да дзоньтавны инфраструктура объектъяс, чукӧртны ёг-лӧпсӧ берег дорысь да вӧрысь, кольчаавны лэбачьясӧс, отсавны туявны пемӧсъяссӧ да быдмӧгъяссӧ, сетны экологияын тӧдӧмлунъяс да сідз водзӧ. Заповедникыс сулалӧ зэв мича юяслӧн ковтысын – Печора, Ылыдз да Унья.
Печора – зэв кыпыд, «Войвыв Волга», но заповедникын позьӧ аддзывны сылысь йывсӧ, коді ёнджыкасӧ мунӧ ичӧтик ёль вылӧ, а оз ыджыд ю вылӧ. Ылыдз – камернӧйджык, мукӧдлаын топӧдӧма мича крежъясӧн. Наӧн нимкодясьӧны туристъяс, кодъяс кылӧдчӧны ю кузя.
Кык вонас ӧтчыдысь, ар пуксигӧн, ылыдзвывса Еремей грезд виччысьӧ гӧсьтъясӧс Вӧралысьяслӧн гаж вылӧ, кӧні петкӧдласны войвыв мортлысь важся кужанлунъяссӧ, коді олӧ парма да юяс пӧвстын.
Мылдін районса Гришестав грездын нуӧдӧны «Сено» экологическӧй арт-фестиваль.
Некымын лун неыджыд грездын уджалӧны дизайнеръяс, архитекторъяс, художникъяс, музыкантъяс, кодъяс вӧчӧны турунысь да пуысь зэв мича арт-объектъяс.