Сыктывкар
«Сыктывкар» кар кытш меститчӧ Коми Республикалӧн рытыв-лунвылын. Сыкӧд орччӧн Коми республикаса Сыктывдін да Кӧрткерӧс районъяс. Сыктывкар – Коми республикалӧн юркар.
Кар йылысь
Ӧтувъя юӧр
Административнӧй шӧрин: Сыктывкар, Коми республикалӧн юркар
Площадь: 749 кв. км
Кар кытшын олӧ: 258 437 морт (на лыдысь 243 279 морт олӧ Сыктывкарын)
Медшӧр отрасльяс: вӧр переработайтӧм, стрӧитчан материалъяс вӧчӧм, кытӧм материалъяс вӧчӧм
«Сыктывкар» кар кытшса муниципальнӧй юкӧнлӧн официальнӧй сайт: сыктывкар.рф
Содтӧд юӧр
Карсӧ артмӧдӧма 1780 вося урасьӧм тӧлысь 5 лунӧ Екатерина ІІ Индӧд серти. Медводдза нимыс – Усть-Сысольск, 1930 воын нимсӧ вежисны Сыктывкар вылӧ, мӧд ногӧн кӧ, «Сыктыв вылын кар».
Сыктывкар меститчӧ Россияса Европейскӧй юкӧнлӧн асыв-войвылын, Москвасянь 1410 км асыв-войвывлань, Сыктыв да Эжва юяс пӧлӧн. Кар гӧгӧр быдмӧ вӧр.
Тӧвшӧр тӧлысьӧ шӧркодь температураыс – Цельсий серти 15 градус кӧдзыд, сора тӧлысьӧ – Цельсий серти 17 градус шоныд.
Ӧні Сыктывкарӧ пырӧны карлӧн шӧрыс да важъя посёлок-местечкоясыс. Найӧс шуӧны важ нимъяснас: Давпом, Ыліпом, Стрӧитель, Дырнӧс, Яйкомбинат, Чит, Кӧджпом, Вӧрзавод, Кырув, Ошвидз, Мӧдлапӧв, Париж, Тентюков, а сідзжӧ Эжва район.
Кытшӧ пырӧ 7 олан пункт: республика тӧдчанлуна 1 кар (Сыктывкар), карын ӧти район (Эжва), 3 уджалан посёлок (Вылыс Максаковка, Краснозатонскӧй, Сьӧдкыркӧтш). Вылыс Максаковка уджалан посёлоклӧн администрацияӧ пырӧны Выльтыдор да Вылыс Мыртыю посёлокъяс, Сьӧдкыркӧтш уджалан посёлоклӧн администрацияӧ – Трёхозёрка посёлок.
Россияса мукӧд регионсянь Комилӧн юркарӧ да бӧр позьӧ мунны самолётӧн, автомашинаӧн да кӧрт туй кузя. Автобусӧн позьӧ мунны республикаса районъясӧ, а сідзжӧ Казаньӧ, Кировӧ, Котласӧ, Йошкар-Олаӧ, Чебоксарыӧ да мукӧд карӧ.
Нималанторъяс
Сыктывкар – Коми республикалӧн культурнӧй юркар. Карын уджалӧны музейяс, выставка залъяс, театръяс, национальнӧй культура шӧринъяс, библиотекаяс, филармония, творчество студияяс.
Карса олысьяс да гӧсьтъяс радейтӧны волыны Вежа Степан нима кафедральнӧй собор, паркъясӧ, скверъясӧ да Сыктыв юлӧн аслыспӧлӧс набережнӧй вылӧ, кысянь тыдалӧ, кыдзи Сыктыв ю усьӧ Войвыв Двинаӧ визувтысь Эжваӧ.
Сыктывкарын йитчӧны ӧнія урбанистическӧй тенденцияяс да важ Усть-Сысольсклӧн, кыдзи водзын шулісны юркарнымӧс, пу керкаяс. Тайӧ дзик ӧти кар, кодлӧн аэропортыс сулалӧ кар пытшкас, а нӧшта тані эм Европаын медся кузь шӧртуй – Октябр шӧртуй – да мирын медся векни уличкост – Тшака уличкост.
Шӧр универмаг дорын быть колӧ вӧчны снимок коми вӧралан календарлы памятник дорын, а Коми культура шӧрин дорын – коми анбурлӧн 18 «Ӧ» шыпаслы памятник дорын.
Сыктывкарын эм мезолит кадся предмет – «Йиркаплӧн лызь». Коми Республикаса национальнӧй музейысь экспонатлӧн арлыдыс – 7 000 во. Таӧдз медся важ лызьӧн лыддьыссис Норвегияын «Дубокрайскӧй аддзӧмтор», сылӧн арлыдыс 4 500 во гӧгӧр.
Карлӧн важ юкӧнті – Сӧветскӧй да Орджоникидзе уличьясті – ветлӧдлігӧн быттьӧкӧ веськавлан колян нэмся 50-60-ӧд воясӧ, а важся особнякъяс дорын быттьӧкӧ волан сё во сайся олӧмӧ. Юркарті ветлӧдлігӧн позьӧ пыравны вӧрӧ, вотыштны чӧд, а рытнас ветлыны театрӧ.
Izі.travel мобильнӧй приложениеын ветлысь-мунысьяс аддзасны Сыктывкар йылысь уна сикас аудиогид да квест. Сӧмын колӧ пуктыны телефонӧ приложение, и виртуальнӧй висьтавлыськӧд кар кузя ветлӧдлігӧн ті тӧдмаланныд кык пӧв унджык. Миян серти, медбур заводитны «Сыктывкарские прогульщики» аудиогидсянь. Сійӧ некымын кыв вылын (рочӧн, комиӧн да английскӧйӧн) тӧдмӧдас тіянӧс кар шӧрӧн, аслыспӧлӧс арт-объектъясӧн, та дырйи кутас юргыны национальнӧй шылад.
«Старый Сыктывкар» аудиогид отсалас унджык тӧдмавны историческӧй керкаяс йылысь, а «Городские легенды» аудиогид восьтас ветлысь-мунысьлы карсаяс пӧвстын нималана объектъяс.