Княжпогост район
Россия Федерацияса Коми Республикаын административнӧй-мутасса единица да муниципальнӧй юкӧн (муниципальнӧй район).
Район йылысь
Ӧтувъя юӧр
Административнӧй шӧрин: Емва кар
Площадь: 24615,60 кв.км
Олӧ 18 539 морт
Медшӧр отрасльяс: вӧр переработайтӧм, вӧр лэдзӧм
Нималанторъяс
Княжпогост районса Емва кар дорын сулалӧ «Вӧрвож» усадьба, кӧні кӧзяйкакӧд тшӧтш гӧсьтъясӧс паныдалӧн вӧвъяс, курӧгъяс, кӧзаяс, сенбернаръяс да таксаяс.
Усадьбаын нуӧдӧны туристъяслы быдсикас программаяс.
Карыс йитчӧма кӧрт туйкӧд, сійӧ сулалӧ сӧстӧм Емва ю пӧлӧн, мый нималӧ чери кыйӧмӧн. Туръя сикт – медваж коми сикт-грездъясысь ӧти. Справочникъяс серти, сылы 600 во гӧгӧр нин. Тані сулалӧ сиктысь петӧм нималана морт, социологиялы подув пуктысь Питирим Сорокинлы обелиск (сылысь ним сетӧма Сыктывкарса университетлы).
Район сідзжӧ нималӧ «Серегов» бальнеологическӧй санаторийӧн. Гашкӧ, важ корпусъясын абу сэтшӧм лӧсьыд овны, но тані бурдӧдӧны Сереговын перйӧм совъяс отсӧгӧн, татшӧмыс сэсся некӧн абу. Матын регыд помаласны кыпӧдны курортлысь выль корпусъяс, но найӧс абу на пыртӧма уджӧ.
Курортсянь неылын сулалӧ аньяслӧн медся войвывса обитель – Кывтываса Крестовоздвиженскӧй манастыр, кӧні видзӧны Олӧм сетысь Вежа крест юкӧнтор. Манастырын радпырысь паныдаласны паломникъясӧс, висьталасны налы, кыдзи манастырыс артмис, жугаліс да выльысь ловзис.